Headlines

ඌවේ මැතිවරණය : රාජපක්ෂලාගේ වින්දනය දියාරූ වීම

Posted by Sri Lanka Guardian | Sunday, September 21, 2014 | Posted in , , , ,


| නිලන්ත ඉලංගමුව
 


බොරුවට සහ මුලාවට වඩා ඕනෑම දෙයක් හොඳය
ලියෝ ටෝල්ස්ටෝයි - ඇනා කැරෙනිනා


ඌව පළාතේ මැතිවරණ කෝලාහලය අවසන් විය. මැතිවරණය  රාජපක්ෂගේ ගුණ්ඩුවකි. ඔහු එම ගුණ්ඩුව ඔස්සේ තොන්ඩුව දැමුවේ රටේ සමස්ථය දෙස බලා තම අසාවට ඇති ඉල්ලුම කිරා මැනීමටය. මන්ද ඔහුට ඔහුගේ සැබෑ අභියෝගය සඳහා කාලය මොහොතින් මොහොත කිට්ටු වෙමින් තිබේ. එම ආසාව මඟින් දී ඇති අභියෝගය වූ කලී, ඔහු තම තොණ්ඩුව දමා අපේ මාතෘ භූමියේ ගෙල සිරකොට මරා දැමීමෙන් සංසිදුවා ගත හැකිද, නොඑසේනම් රටේ මාතෘභූමියේ වෙසෙන සැබෑ දේශප්‍රේමීන් එක්වී රාජපක්ෂ වරිගය සතු බලය ක්‍ෂය කොට රටේ පැවැත්ම තහවුරු කළ හැක්කේද, යන්න පිළිබඳව වූ අභියෝගයයි.

ඌව පළාතේ මැතිවරණය ගැන, දේශපාලන පක්ෂ නියෝජනය කළ අයවලුන්ගේ මතයට අනුව දිනපු අයෙකුත් නැත. පැරදුණු අයෙකුත් නැත. සියල්ලෝම හැකි ප්‍රමාණයෙන් දිනා ඇත්තෝය. එය හෙට දිනයේ සිට ඔවුන්ගෙන් විවිධාකාර විග්‍රහයන් ඔස්සේ ඇසීමට ලැබෙන කතාන්දරය වේ. නමුත් සත්‍යට අනුව රාජපක්ෂගේ වරිගය පරාජය වී ඇත. එය රාජපක්ෂ ජනාධිපතිවරයාට ඇතුළු ඔහුගේ බලයට එරෙහිව එල්ල වූ අකුණු සැරයකි.

රාජපක්ෂ මෙම මැතිවරණය තමන්ගේ මැතිවරණයක් එනම් තමන් අපේක්ෂකයෙකු ලෙස තරග වදින ආකාරයෙන් මෙහි  ප්‍රචාරණ කටයුතු කරනු ලැබීය. රටේ මහජන මුදල් තව දුරටත් තමන්ට හැකි උපරිමයෙන් ඔහු මෙහිදීද විනාශ කළේය. නමුත් ඔහු සිතූ-පැතූ දේ ඔහුගෙන් ඈත් වී ඇත. ප්‍රමෝදය වෙනුවට විඩාව ලබා දී ඇත. වින්දනය දියාරූ වී ඇත. තරමක ආස්වාදයක් ලැබී ඇතැයි ඔහුට සිතුණද, එය මුලාවක් බව ඔහු දන්නේය.

හීනෙන්වත් පාරාජය කිරීමට නොහැකි යැයි පුරසාරම් දෙඩු රාජපක්ෂට, ජනතාව තම නිහඬ උත්තරය හැකි උපරිමයෙන් ලබා දී ඇත. රටේ සම්පත් අයාලයේ භාවිතා කිරීමට නොදී අදාළ මැතිවරණය මුලික ප්‍රජාතන්ත්‍රවාදී මුලධර්මයන් වලට අනුකූලව පැවැත් වූයේ නම්  රාජපක්ෂට ඇපත් නැතිවනු ඇත. ප්‍රදේශයේ සෑම ගලක්, ගහක්, ගොඩනැගිල්ලක් පමණක් නොව මහජනතාවට ගමන් කිරීමට ඇති මඟී බස් රථය පවා තම වරිගයේ අයවලුන්ගේ නම් වලින් සහ දැන්වීම් වලින් නහවනු ලැබීය. ප්‍රදේශයේ ජනතාවට පන්සලට ගොස් තම අගමිකවතාවන් කිරීමට හෝ ඉඩක් නොදී එම අවස්ථාව පවා තම නීච ආත්මාර්ථකාමී බල තණ්හාව වෙනුවෙන් භාවිතා කළහ.  

මේ සියලු දෑ වලින් අවබෝධ වන්නේ, ලංකාවේ මැතිවරණ වූ කලී  අනෙකාගේ කාලයත්, ශ්‍රමයත් , රටේ පොදු ජනතාවට  බුක්ති විඳීමට ඇති රාජ්‍ය සතු ධනයත්, සමඟ කිහිප දෙනෙකු එකතු වී කරණ නරක සෙල්ලමක් පමණක් බවයි. මෙය සදාකාලික රෝගයක් බවට පත් වී ඇත. මේ මඟින් ඇති කොට ඇත්තේ ගැඹුරු වේදනාවකි. මැතිවරණයේ පශ්චාත් වටපිටාව වනාහී ප්‍රචාරණ ව්‍යාපෘතිය මඟින්  වසා දමනු ලැබූ එම ගැඹුරු වේදනාව යළි අවදිවීමක්  පමණි.  නමුත් ළිං කටෙන් ගොඩ එනු මිස වෙන මගක් නැති ජාතියක් බවට අප පත්කොට ඇත්තාහ.

ඌව පළාතේ මැතිවරණය විපක්ෂයට වැදගත් “ජයග්‍රහණයක්” ලෙස පෙනුණද යථාර්තයට අනුව එය එසේ නොවේ. නමුත් මෙම ප්‍රතිඵලය වූ කලී  සැබෑ අභියෝගය සඳහා වන මාර්ගය විවර වීමක් ලෙස පමණක් ලෙස දැකිය හැකිය. සැබවින්ම එය මානසික ශක්තිය වැඩිකිරීමෙහිලා වැදගත්ය. එසේම මීළඟ පියවර සඳහා එය අතිශය වැදගත් අවස්ථාවක් වේ.

මැතිවරණයෙන් පෙනෙන වැදගත්ම කාරණය නම්, රාජපක්ෂගේ පුරසාරම ස්වභාවික නීතයට යටත් වී ඇති ආකාරයයි.

නමුත් බලය තවමත් ඔහු සතුය. එසේම රටේ ධනය රිසි සේ භාවිතා කරනු ලබන්නේ ඔහු සහ ඔහු වටා සිටින අයවලුන්ය. මේ නිසා මෙය දේශපාලන වෙනසක් වෙනුවෙන් කල්පනා කරණ අයවලුන්ට අතිශය සංවේදී ජනක අවස්ථාවකි. මෙවැනි අවස්ථාවන් වඩාත් සංකීරණ මෙන්ම සංවේදී වන්නේ ඉතා කෙටි තීරණයක මඟින් සියල්ලම වෙනස් විය හැකි බැවිනි.

ආඥාදායකයෙකු නිකමයාමට අවශ්‍ය වටපිටාව නිර්මාණය වීම ස්වභාවික නිතීයේ කටයුත්තක් වුවද එය මෙහෙවීම අදාළ ආඥාදායකයාට එරෙහි බලඇණිය සතු ඥානය පිළිබඳව වන භාරදූර කටයුත්තකි.

හිටපු ජනාධිපතිනිය මෙය නිවැරදිව අවබෝධ කරගෙන සිටින සැටියෙකි. ඇය, රටේ හමුදා පාලනයක් ඇතිවේ යැයි තම භීතිය පල කොට ඇත්තාය. සැබවින්ම එවැනි තත්වයකට රට තල්ලු වීමේ අවදානමක් ඇත.එය වෙනත් රටවල මෙන් නොව රටේ ආඥාදායකයා සහ ඔහුගේ වරිගය බේරාගැනීම සඳහා ඇතිවන එකක් විය හැකිය. 

යුද්ධයෙන් පසු ගත වූ වසර කිහිපය තුළ, මුලාවෙන් ජයගත හැකි තාක් දුරට කිසිවක් බලෙන් ලබා ගැනීමට රාජපක්ෂ නොගියේය. ඔහු දේශපාලනය ලෙස කරනු ලැබුවේ, තම පෞද්ගලික වපසරිය වැඩි කරගනිමින්, මුලාව තව දුරටත් පෝෂණය කිරීමය. මේ වනවිට මුලාවට ඇති වටිනාකම ක්‍රමයෙන් හීන වී ඇත. මේ නිසා ඔහුට බලහත්කාරයෙන් ලබා ගැනීම නමැති උපාය වෙත තල්ලු වීමට සිදු වී තිබේ. 

සැබෑ වටපිටාව හමුවේ දුර්වල වී සිටින රාජපක්ෂ තම ආසාව සංසිදුවා ගන්නා තෙක්,  අයෝමය බව ඒත්තු ගන්වනු ඇත. ඒ සඳහා රටේ සෑම ගොඩනැගිල්ලක් පමණක් නොව ඉදිරියේදී මහජන පොදු වැසිකිළි පමණක් නොව පෞද්ගලික වැසිකිළි වල පවා තම නම කොටා උත්වශ්‍රීයෙන් ඒවායෙහි වැහුම් අරිනු ඇත. එය ඔහු තම බලය අවභාවිතා කරණ ආකාරයයි. මන්ද තම බලය රැක ගැනීම සඳහා මවාපෑම සහ බලෙන් ඇතිකරන වීරත්වය හැරෙන්නට වෙනත් කිසිවක් අභ්‍යන්තරය තුළ නැත.

එම මුලාකිරීමට සමත් බලය හමුවේ විපක්ෂ තම නියාලු සහ කුලල් කාගන්නා ප්‍රතිපත්තිය රැගෙන ගියහොත් භුමියේ වාසිය යළිත් “ කෲර පාලකයා” සතුවනු ඇත.

මේ නිසා ඌව පළාතේ දේශපාලන ප්‍රවණතාවය ඉතා පරෙස්සමින් කියවීම සහ රාජපක්ෂගෙන් විය හැකි වඩාත්ම බිහිසුණුම සහ නරකම අතවරයට මුහුණ දීම සඳහා සූදානම් වීම වැදගත් වේ. ජාතික සහ ජාත්‍යන්තර වශයෙන් ඊට අවශ්‍ය පසුබිම නිර්මාණය කිරීම මෙහිදී අතිශය වැදගත් වේ.

ඌවෙන් දැල්වූ මේ පළමු වෙඩි මුරය, රාජපක්‍ෂ පවුලේ සාපයෙන් ජනතාව මුදා ගැනීම සඳහාය

Posted by Sri Lanka Guardian | | Posted in , , ,

 | ඌවේ මැතිවරණ ප්‍රතිපල විග්‍රහ කරමින් එක්සත් ජාතික පක්‍ෂය නිකුත් කළ පුවත් නිවේදනය

බ්‍රිතාන්‍ය  අධිරාජ්‍යවාදීන් මෙරටින් පළවා හැරීමේ අරමුණින් දියත් වූ සටනට දැඩි බලපෑමක් ගෙන දුන් මෙරට නිදහස් අරගලයේ පළමු වෙඩි මුරය ඌව  වෙල්ලස්සෙන් ඇසුනේ මීට වසර 200 කට ඉහතදී ය.

එම වීර ජීවගුණය යළි දෝංකාර නංවමින් නිදහස හා සාධාරණත්වය මුදුන්පත් කර ගැනීමේ අභිලාෂය පෙරදැරිව අඥාදායක රාජපක්‍ෂ පාලනය පැරදවීමේ සටන ඓතිහාසික ඌව වෙල්ලස්සෙන් දැන් යළි ආරම්භ වී තිබේ.

සුළුතරයක් සනසවමින්, ඔවුන්ව පමණක් පෝෂණය කරමින්, රටේ බහුතරයක් ජනතාව නොසලකා හරිමින් වත්මන් රෙජීමය ගෙන ගිය එම දුර්දාන්ත ප්‍රතිපත්ති බරපතළ ලෙස ප්‍රතිෙක්‍ෂ්ප කිරීම ඌව පළාත් සභා මැතිවරණ ප්‍රතිඵල තුළ පෙනෙන්නට ඇත. රාජ්‍ය පාලනය සම්බන්ධ ඔවුන්ගේ මන්තරයෙන් තවදුරටත් තමන් රැවටිය නොහැකි බව ඌවේ ජනතාව පෙන්වා තිබේ.

නීති විරෝධී ආකාරයෙන් තුන් වැනි වරටත් ජනාධිපතිවරණයට තරග කිරීමට ඇති රාජපක්‍ෂ ජනාධිපතිවරයාගේ නොනිමි ආශාව තුළ ඔහු, සෙනසුරාදා නිමාව දුටු මැතිවරණය සම්බන්ධයෙන් දැඩි උනන්දුවක් මුල සිටම දක්වන ලදී. ඡන්ද ප්‍රචාරක ක්‍රියාවලියේ අවසානය තෙක්මඌවේ රැඳී සිටිමින් ඔහු උත්සාහ කළේ තීරණාත්මක සටනට පෙර තම ශක්තිය පිටතට පෙන්වීමටය.

අනිත් අතට ඌව පළාත සැලකෙනුයේ එක්සත් ජනතා නිදහස් සන්ධානයේ ශක්තිමත් බල කොටුවක් ලෙසය. මේ මැතිවරණ ප්‍රතිඵලයේ විශිෂ්ඨත්වය වැඩි වනුයේ ඒ සන්දර්භය තුළය.

රාජපක්‍ෂවරු සතු ශක්තිමත් බලකොටුව පවා ජනතා ශක්තිය මතින් බිඳලිය හැකි බවට වන වැදගත් පණිවුඩය මේ ප්‍රතිඵලය තුළින් රටේ සෙසු ජනතාවට හා පිටස්තර ලෝකයාට ලබාදී තිබේ.

සැබැවින්ම මෙවර රජයට නිසි පිළිතුරු ලැබී ඇත. ඓතිහාසික ඌව වෙල්ලස්සෙන් රාජපක්‍ෂ රෙජීමයට ලැබුණු ඒ පණිවුඩය හඳුනාගැනීමට ඒ හැටි අසීරු නොමැත. එය සුපැහැදිලිය. වත්මන් රජය හා එහි ප්‍රකාශකයන් සමාජගත කරමින් සිටින මිත්‍යාවන්ට තවත් එපාෙ යන පණිවුඩය ජනතාව මැතිවරණ ප්‍රතිඵල හරහා ලබා දී ඇත.

දූෂණයෙන් පිරුණු වත්මන් රජයේ කොල්ලකාරී වැඩපිළිවෙළ තවත් තමන් නොඉවසන බව ජනතාව ප්‍රකාශ කර තිබේ.

 ඥාති සංග්‍රහය හා දැඩි ආත්මාර්ථකාමී පාලනය තුළ තමන් වෙහෙසට පත්ව ඇති වග ජනතාව පෙන්වා දී තිබේ. නීතිය නිසි ලෙස ක්‍රියාත්මක නොවීම, වැරදිකරුවන් සම්බන්ධයෙන් පාලක රෙජීමය අනුගමනය කරන ලිහිල් ප්‍රතිපත්ති ජනතාව මැතිවරණයේ දී ප්‍රතික්ෂේප ප්‍රතික්ෂේප  කර තිබේ.

ගෙදර යෑම සඳහා පැදුරු අකුලා ගනිමින් සූදානම් වන ලෙසට, ජනතාව රාජපක්‍ෂ රෙජීමයට පණිවිඩයක් ලබාදී තිබේ.

භීතිය හා දූෂණය වපුරවමින් සිටින වත්මන් පාලනය සහතිකවම, තම අවසානය කරා ළඟා වෙමින් සිටී.

ප්‍රජාතන්ත්‍රවාදය දිනෙක ජය ගන්නා බව දැන් ඉතා පැහැදිලිය. සෙනසුරාදා පැවැති ඡන්ද විමසීමේ දී ඒ සඳහා අවශ්‍ය මාවත ඌව වෙල්ලස්සේ වීරෝදාර ජනතාව පෙන්වාදී ඇත.

ඉතා සද්භාවයෙන් යුතුව තමන් සිදු කළ අතිමහත් පරිත්‍යාගය වෙනුවෙන් නිසි ප්‍රතිඵල හරීන් ප්‍රනාන්දු මහතාට ලැබී තිබේ. රාජපක්‍ෂ පාලනයේ සමස්ත රාජ්‍ය යාන්ත්‍රණයට ශක්තිමත්ව මුහුණ දෙමින් ජනාධිපතිවරයාගේ බෑණනුවන් සමඟ තරග වැදුණු මේ තරුණ දේශපාලනඥයා, තමන් ලබාගත් අතිසාර්ථකත්වය හරහා දේශපාලන හිණිමඟේ ඉහළට යාමට බලාපොරොත්තුවෙන් සිටින තරුණ දේශපාලනඥයන්ට හා දේශපාලන විශාරදයන්ට ද මාහැඟි ආදර්ශයක් ලබාදී ඇත.

 ඔහු කළ සුවිසල් කැපකිරීම, බදුල්ල ප්‍රමුඛ ඌවේ ඡන්ද ව්‍යාපාරයට ලබා දුන් ජීවය තුළ මීළඟ ජනාධිපතිවරණය ජය ගැනීමට අවශ්‍ය මාවත කරා එජාපය රැගෙන යාමට හරීන් සමත්ව ඇත.

මේ මැතිවරණ ප්‍රතිඵල නිසා බියෙන් සැලූණු රාජපක්‍ෂ රෙජීමය, 2009 ඌව පළාත් සභා මැතිවරණ ප්‍රතිඵල සමග මෙවර ප්‍රතිඵලය සංසන්දනය නොකරන මෙන් සියළු විද්‍යුත්  මාධ්‍යයන් වෙත බලපෑම් කර ඇත. මේ නිසා විද්‍යුත්  මාධ්‍යයන්හි වෙබ් අඩවිවල තිබූ එවැනි සංසන්දනාත්මක කරුණු සියල්ල ඉවත් කරලීමට ද, මාධ්‍ය ඔස්සේ සිදු කෙරුණු සංසන්දනාත්මක විග්‍රහ නවත්වා දැමීමට ද මාධ්‍යයන්ට සිදු වී තිබේ.

මෙයින් පිළිඹිබු  වන්නේ රාජපක්‍ෂ රෙජීමය සහ විශේෂයෙන්ම ජනාධිපති මහින්ද රාජපක්‍ෂ මහතා පත් වී ඇති දේශපාලන අස්ථාවරත්වයයි.

සැලසුම් කළ ආකාරයටම මැතිවරණය පවත්වා, රාජපක්‍ෂ පාලනයේ පසුගිය 9 වසර තුළ ජනතාව පත්ව ඇති ව්‍යාකුලතාව, දුක්ඛිතතාව පිළිබඳ සැබෑ සත්‍යයට මුහුණ දෙන ලෙස අප රජයට අභියෝග කරන්නෙමු.

රජයේ අධිකාරිවාදී පාලනයට හා දූෂණයට එරෙහිව ඌවෙන් දැල්වූ මේ පළමු වෙඩි මුරය, රාජපක්‍ෂ පවුලේ සාපයෙන් ජනතාව මුදා ගැනීම සඳහා ඊට එරෙහි සියලූ බලවේගවලට එක්සත් වන ලෙස යළි බලකර තිබේ.

2014. 09. 21

ඌවේ මනාප ප‍්‍රතිඵල නිකුත් වෙයි : හරීන් පෙරමුණට ( මනාප - 1,73,993 )

Posted by Sri Lanka Guardian | | Posted in , , ,

| පාලිත ආරියවංශ

ඌව පළාත් සභා මැතිවරණයේ මනාප ප‍්‍රතිඵල සියල්ල මේ වන විට නිකුත් කර තිබෙනවා. එ් අනුව මොණරාගල දිස්ති‍්‍රක්කයෙන් එක්සත් ජනතා නිදහස් සන්ධානයට හිමි වු මන්තී‍්‍ර ධුර සංඛ්‍යාව 08ක්. එහි මනාප ප‍්‍රතිඵල අනුව ප‍්‍රථමස්ථානය හිමිකර ගෙන තිබෙන්නේ මහ ඇමැති ධුර අපේක්ෂක ශෂීන්ද්‍ර රාජපක්ෂ මහතායි. ඔහු ලබාගෙන ඇති මනාප සංඛ්‍යාව 96,619ක්.

මනාප 59,285ක් ලබා ගනිමින් කුමාරසිරි රත්නායක මහතා දෙවන ස්ථානය දිනා ගනිමින් ඌව පළාත් සභාවට තේරීපත්ව සිටිනවා. උදාර සොයිසා මහතා ලබාගෙන ඇති මනාප සංඛ්‍යාව 48,512ක්. සාලිය සුමේධ මහතා මනාප 21,206 ක් ලබාගෙන තිබෙනවා.

සෙනරත් අත්තනායක මහතා මනාප 19,448 ක් ලබාගෙන ඇති අතර  විමලදාස ගලගමආරච්චි මහතා ලබාගෙත් මනාප සංඛ්‍යාව 17,625ක්. හරීන් ධර්මදාස මහතා මනාප 15,843ක් ලබාගෙන තිබෙනවා. පද්ම උදේශාන්ත ගුණසේකර මහතා ලබාගෙන ඇති මනාප සංඛ්‍යාව 12,412ක්.

මේ අතර එක්සත් ජාතික පක්ෂයට මොණරාගල දිස්ති‍්‍රක්කයෙන් මන්ත‍්‍රි ධුර 5ක් හිමි වුණා. එ් අනුව එම පක්ෂයේ මනාප ප‍්‍රතිඵල අනුව පළමු ස්ථානය හිමිකරගෙන තිබෙන්නේ ආනන්ද කුමාරසිරි මහතායි. ඔහු ලබාගෙන ඇති මනාප සංඛ්‍යාව 24,421ක්. එච්.එම්.ධර්මසිරි මහතා මනාප 18,400ක් ලබාගනිමින් දෙවන ස්ථානය දිනාගෙන තිබෙනවා.

තිස්ස කුට්ට්ආරච්චි මහතා ලබාගෙන ඇති මනාප සංඛ්‍යාව 18,265ක්. ජයසිංහ බණ්ඩාර මහතා මනාප 16,437ක් ලබාගෙන තිබෙනවා. අර්වින් කරුණාවර්ධන වීරරත්න මහතා ලබාගත් මනාප සංඛ්‍යාව 15,835ක්.

මේ අතර ජනතා විමුක්ති පෙරමුණේ ආර්.එම්. ජයවර්ධන මහතා මනාප 5795ක් ලබා ගනිමින් ඌව පළාත් සභාවට මොණරාගල දිස්ති‍්‍රක්කයෙන් තේරී පත්ව සිටිනවා.

බදුල්ල දිස්ති‍්‍රක්කයේ ඡුන්ද ප‍්‍රතිඵල අනුව එක්සත් ජනතා නිදහස් සන්ධානයට මන්ති‍්‍ර ධුර 09ක් හිමි වුණා. එක්සත් ජාතික පක්ෂයට හිමි වූ මන්තී‍්‍ර ධුර සංඛ්‍යාව 08ක්. ජනතා විමුක්ති පෙරමුණටද එක් මන්ති‍්‍ර ධුරයක් හිමි වුණා. එ් අනුව බදුල්ල දිස්ති‍්‍රක්කයෙන් වැඩිම මනාප ප‍්‍රමාණයක් හිමිකරගෙන ඇත්තේ එක්සත් ජාතික පක්ෂයේ මහ ඇමැති ධුර අපේක්ෂක හරීන් ප‍්‍රනාන්දු මහතායි. ඔහු ලබාගෙන ඇති මනාප සංඛ්‍යාව 1,73,993ක්.

එම පක්ෂයෙන් මනාප 30,457ක් ලබා ගනිමින් වේලායුදන් රුද්‍රදීපන් මහතා  දෙවන ස්ථානය දිනාගෙන ඌව පළාත් සභාවට තේරී පත්ව සිටිනවා. සුනිල් ජයන්ත කන්නන්ගර මහතා ලබාගෙන ඇති මනාප සංඛ්‍යාව 28,290ක්. උපාලි සමරවීර මහතා මනාප 28,229ක් ලබා ගනිමින් ඌව පළාත් සභාවට තේරී පත්ව සිටිනවා.

රවීන්ද්‍ර සමරවීර මහතා ලබාගෙන ඇති මනාප සංඛ්‍යාව 25,580 ක්. සෙනරත් ජයසූරිය මහතා මනාප 24,216ක් ලබා ගෙන ඇති අතර උපාලි සේනාරත්න මහතා ලබාගෙන ඇති මනාප සංඛ්‍යාව 22,272ක්. ර.මු රත්නායක මහතා මනාප 22,249ක් ලබා ගනිමින් ඌව පළාත් සභාවට තේරී පත්ව සිටිනවා.

මේ අතර එක්සත් ජනතා නිදහස් සන්ධානයෙන් බදුල්ල දිස්ති‍්‍රක්කයට මන්තී‍්‍ර ධුර 9ක් හිමි වුණා. එම සන්ධානයෙන් වැඩිම මනාප ලබාගෙන ඇත්තේ අනුර විදානගමගේ මහතායි. ඔහු ලබාගෙන ඇති මනාප සංඛ්‍යාව 59,316ක්. චාමර සම්පත් දසනායක මහතා මනාප 34,337ක් ලබාගෙන තිබෙනවා.

සෙන්දිල් තොණ්ඩමන් මහතා මනාප 31,858ක් ලබාගෙන ඇති අතර සුදර්ශන් දෙනිපිටිය මහතා ලබාගෙන ඇති මනාප සංඛ්‍යාව 28,187ක්. එ්.එම්. බුද්ධදාස මහතා මනාප 25,193ක් ලබාගෙන තිබෙනවා. වඩිවේල් සුරේෂ් මහතා ලබාගෙන ඇති මනාප සංඛ්‍යාව 21,967ක්. එම්.පී. ලීලසේන මහතා 20,282ක් ලබාගෙන තිබෙනවා. ආරුමුගම් ගනේෂන් මූර්ති මහතා ලබාගෙන ඇති මනාප සංඛ්‍යාව 19,262ක්.

මේ අතර ජනතා විමුක්ති පෙරමුණේ සමන්ත විද්‍යාරත්න මහතා මනාප 14,161ක් ලබාගනිමින් ඌව පළාත් සභාවට තේරී පත්ව සිටිනවා.

ඌව පළාත් සභා මැතිවරණය 2014 :සමස්ථ ඡන්ද ප්‍රතිඵලය

Posted by Sri Lanka Guardian | | Posted in , , ,

2014 ඌව පළාත් සභා මැතිවරණයේ නිල සමස්ථ ඡන්ද ප්‍රතිඵලය මේ වන විට නිකුත් වී අති අතර එය පහත පරිදිය.
ව පළාතේ සමස්ත ඡන්ද ප්‍රතිඵලය
පක්ෂයලබාගත් ඡන්ද සංඛ්‍යාවප්‍රතිශතයමන්ත්‍රී ධුර සංඛ්‍යාව
එක්සත් ජනතා නිදහස් සන්ධානය3,49,90651.25%19
එක්සත් ජාතික පක්ෂය2,74,77340.24%13
ජනතා විමුක්ති පෙරමුණ36,5805.36%02
ප්‍රජාතන්ත්‍රවාදී පක්ෂය6,0760.89%00


ධනවාදී බිඳවැටීම හා යුද්ධය කරා තල්ලුව

Posted by Sri Lanka Guardian | Friday, September 19, 2014 | Posted in

| නික් බීම්ස්

කොතරම් වැදගත් වුවත්, මේ සතියේ පැවති යුරෝපීය මහ බැංකුවේ පාලක මන්ඩල රැස්වීමේ වඩාත්ම කැපී පෙනෙන අංගය, නිල පොලී අනුපාතිකය තවදුරටත් අඩු කිරීම හා වත්කම් පිටුබලය සහිත සුරැකුම් මිලට ගැනීම ආරම්භ කිරීම නොවේ.

2008දී ඇරඹුනු ගෝලීය මූල්‍ය පද්ධතියේ බිඳවැටීමෙන් පසුව ගතවූ සය වසර තුල ආර්ථික “ප‍්‍රකෘතියක්” ගෙන ආ හැකි ප‍්‍රතිපත්ති මාලාවක් වෙත ඔවුන් ලඟාවී නැතුවා පමනක් නොව, තත්වය තවත් නරක අතට හැරීම පිලිබඳ කාරනයට මුහුන දීමේදී මූල්‍ය බලවතුන්ගේ රැස්වීම අරා පැවතුනේ, ව්‍යාධියක ගැඹුරු මනෝගතියකි.

යුරෝ කලාපයේ නිමැවුම තවමත් 2007 පැවති මට්ටම කරාවත් පැමින නොතිබීම හමුවේ, යුමබැ අධිපති මාරියෝ ඩ‍්‍රැගිගේ ප‍්‍රකාශ තුල පිලිබිඹු වූයේ, අඳුරු දැක්මකි. “පහතට නැඹුරු අවදානම්, චක‍්‍රීය වර්ධන ගතිකය අවසන්ව තිබීම, අනාගතය පිලිබඳ විශ්වාසයේ මඳකම” ගැන ඔහු සඳහන් කලේය. මෙම ප‍්‍රකාශ අවධාරනය කිරීමට මෙන් ඊලඟ දිනයේ පලකල වාර්තාවකින්, දෙවන කාර්තුව තුල යුරෝ කලාපයේ ආයෝජන පහත වැටී ඇති බව අනාවරනය කලේය.

යුරෝපීය ආර්ථිකයේ නරක අතට හැරෙන ප‍්‍රවනතා, ගෝලීය වර්ධනය පිලිබඳ වඩාත්ම කැපී පෙනෙන ප‍්‍රකාශනය පමනි. ලෝකයේ තෙවන විශාලතම තනි ජාතික ආර්ථිකය වන ජපානයට, මුදල්මය හා මූල්‍යමය උත්තේජක සැලැස්මක් ඉදිරිපත් කරමින් තල්ලුවක් දෙනු ඇතැයි සැලකූ, “අබේආර්ථික වැඩසටහනේ සැර බාලවෙමින් ඇතැයි” පුලූල් ලෙස පිලිගනු ලබයි.

ලෝකයේ දෙවන විශාලතම ආර්ථිකය වන චීනයේ, 2008 වසරෙන් පසුව ආර්ථික ප‍්‍රසාරනයෙන් වැඩි කොටසකට වග කියන ලද දේපොල වෙලඳපොල හා දේපොල ආයෝජනයේ පහත වැටීම හමුවේ, මූල්‍ය පද්ධතියේ අස්ථාවරත්වය පිලිබඳ කනස්සල්ල පලවෙමින් තිබේ.

“දීප්තිමත් තිතක්” ලෙස සලකන එක්සත් ජනපද ආර්ථිකයෙහි මේ වසරේ මුල් භාගයෙහි වර්ධනය, සමස්ත වශයෙන් සියයට 1.0ක් ලෙස පැවතීම, නරක අතට හැරෙන ගෝලීය ආර්ථික දැක්ම පිලිබඳව ඇඟවුම් සහිතය.

මෙම සාධක හා සංඛ්‍යා පැහැදිලි කරන්නේ, 2008 සැප්තැම්බර්-ඔක්තෝබර් මූල්‍ය බිඳවැටීම වාරික සිදුවීමක් නොව, සිදුවෙමින් ඇති ව්‍යසනයක ආරම්භය සලකුනු කිරීමක් බවයි.

බිඳ වැටීමේ පරිමාව, අගෝස්තු 22දා එක්සත් ජනපද අධිකරන පරීක්ෂනයකට ඉදිරිපත් කල සාක්ෂි මගින් හෙලිදරව් කෙරින. එජ ෆෙඩරල් අධිකරනයට ඉදිරිපත්වූ ලිපි ලේඛන සහිත ගොනුවක, අර්බුදයේ උච්ඡ අවස්ථාවෙහි මහ බැංකුවේ සභාපතිව සිටි බෙන් බර්නාන්කේ කියා ඇත්තේ, “මහා අවපාතය ද ඇතුලු ගෝලීය ඉතිහාසයේ නරකම මූල්‍ය අර්බුදය, 2008 ඔක්තෝබරය හා නොවැම්බරය තුල, පැන නැගුන බවයි. එජ අතිශය වැදගත් මූල්‍ය ආයතන 13න් 12ක්ම සතියක හෝ දෙසතියක කාලය තුල අසාර්ථක වීමේ අවදානමට මුහුනපා තිබුනි.”

බිඳවැටීමේ දුර දිග යන ප‍්‍රතිවිපාක, ආර්ථික, සමාජ හා දේශපාලන ජීවිතයේ සෑම අංශයක් තුලම දැකගත හැකි ය.

ලාභ පද්ධතියේ අර්බුදයට ආර්ථික විසඳුමක් නොමැති තත්වය තුල ලෝකය පුරා පාලක පැලැන්තීන්, මිසෝරි ප‍්‍රාන්තයේ ෆර්ගියුසන් සිදුවීම් වලදී දැකගත හැකිවූ ආකාරයට, කුමන හෝ ප‍්‍රතිරෝධයක් මිලිටරි බලය යොදා තලා දැමීමට අදිටන් කරගත් අතර කම්කරු පන්තියට එරෙහි සිය ප‍්‍රහාර උත්සන්න කලේය.

සමාජ අසමානතාව පුලුල් වෙමින් තිබේ. ඊනියා “ප‍්‍රකෘතියේ” අවධිය ලෙස සලකන 2010 සිට13 අතර කාලයේ ඇමරිකාවේ මධ්‍යම මට්ටමේ සමාජ ස්ථරයෙහි ආදායම සියයට 5න් පිරිහුනු බව මහ බැංකු දත්ත මගින් පෙන්නුම් කලේය.

පෙර නොවූ විරූ මිලිටරිවාදයෙන් අංගලක්ෂිත භූ-දේශපාලන තත්වය, තවත් ලෝක යුද්ධයක කොන්දේසි, 1939න් පසු කවර කලෙකවත් නොදුටු තරම් සමීපකර තිබේ.

1914 පලමු ලෝක යුද්ධය පුපුරා යාමට යටින් පැවති හේතු විමසා බලමින් ලියොන් ට්‍රොට්ස්කි, ලෝක ආර්ථික අර්බුදය හා මිලිටරිවාදය කරා නැඹුරුවීම අතර සම්බන්ධය ගෙනහැර දැක්වීය. ඔහු සඳහන් කල කිසිවක් අදට ඇති අදාලත්වය අහිමිකරගෙන නැත.

2008ට පෙර අවධිය මෙන් පලමු ලෝක යුද්ධයට තුඩු දුන් පූර්ව වසර කිහිපය, කුනාටු සහගත ආර්ථික වර්ධනයකින් සලකුනු විය. එහෙත් 1913-14 වන විට එම වර්ධනයේ සීමාවන් කරා එලඹී තිබුන අතර ලෝක ආර්ථිකය අති මූලික මාරුවකට මුහුන දුන්නේය.

1890 ගනන් මැද හරියේ පටන් ධනේශ්වර වර්ධනයේ පාදක වක‍්‍රය තියුනු ලෙස ඉහල නැගුනු බව ට්‍රොට්ස්කි පැහැදිලි කලේය. එහෙත් මෙම උඩු ගමනම බිඳවැටීමකට කොන්දේසි ද නිර්මානය කලේය.

“හුදෙක් වාරික උච්ඡාවචනයක් පමනක් නොව, දිග්ගැස්සුන ආර්ථික පල්වීමේ යුගයක ආරම්භය සලකුනු කල අර්බුදයක් 1914දී කඩාපාත්විය. අධිරාජ්‍යවාදී යුද්ධය මෙම ආවෘත අන්තරය බිඳ දැමීමට දරන ලද උත්සාහයකි.” ට්‍රොට්ස්කි එසේ ලිවීය.

ධනේශ්වරය, “වෙලඳපොලේ සීමාවන් හමුවේ හැකිලී ගිය” තතු හමුවේ, පූර්ව අවධියේ පවත්වාගත් ආර්ථික වර්ධනයේ වේගය තවදුරටත් තබාගැනීම “අතිශය දුෂ්කර” විය.

“මෙයින් නිර්මානය කල පන්ති ආතතීන්, දේශපාලනය මගින් තවත් නරක අතට හැරවූ අතර එය, 1914 අගෝස්තුවේ යුද්ධයට තුඩු දුන්නේය.”

සත්තකින්ම ඉතිහාසය එයම පුනර්කරනය නොකරයි. එහෙත් 1914ට තුඩුදුන් අවධිය හා අපගේම කාලය අතර සමාන්තරයන් කැපී පෙනෙයි. මූල්‍ය පද්ධතිය උග‍්‍ර වන කලබැගෑනියකට මුහුන දීමට පටන්ගැනීමට වසරකට පෙරාතුව 2006 වසරේදී, ලෝක ආර්ථිකය දශක තුනකට වැඩි කාලයක් තුල වර්ධනයේ ඉහලම මට්ටම අත්විඳීය.

සිදුවීම් පිලිබඳ නිල සංස්කරනයට අනුව ඇමරිකානු ආර්ථිකය, 1970 හා 80 ගනන්වල එයට මුහුනපෑමට සිදුවූ ගැටලු අවසානයේදී ජය ගනිමින් “දැවැන්ත නවීකරනයක්” මගින් සංලක්ෂිතව තිබුනි. චීනය හා ඊනියා “නැගී එන වෙලඳපොලවල්” ලෝක ආර්ථිකය සඳහා නව පදනමක් සම්පාදනය කරමින් තිබුනි. අප‍්‍රිකාව පවා දැකගනු ලැබුවේ ගෝලීය ධනවාදයේ ප‍්‍රසාරනය සඳහා නව පදනමක් ලෙසය.

කෙසේ හෝ, මූල්‍ය සමපේක්ෂනයේ හා පරපුටුවාදයේ බෙලි කැඩෙන වර්ධනය සටහන් කල ප‍්‍රසාරනයේ පදනම දැමුනේ පාවෙන වැලි මතය. ක්ෂය රෝගියෙකු මෙන් ධනවාදය, ව්‍යසනයකට ඇද වැටීමට මත්තෙන් රෝස පැහැති කම්මුල් සහිත විය.

කපාහැරීමක ප‍්‍රතිවිපාක පිලිබඳව භීතියට පත් මූල්‍ය වෙලඳපොලවලට, නිමක් නැතිව මුදල් සැපයෙන ප‍්‍රතිපාදන සැලසීම සමග එක්ව, සෑම ධනපති මහ බලවතෙකුම සිය ප‍්‍රතිවාදීන්ගේ වියදමෙන් විසඳුම් සෙවීමට උත්සාහ දරද්දී මිලිටරිවාදය උත්සන්න කිරීම හැරෙන්නට, පාලක පන්තීන්ට ගැලවීමේ අන් මගක් ඇත්තේ නැත.

නරක අතට හැරෙන සමාජ කොන්දේසි හා ඉහල යන අසමානතාව මගින් නිර්මිත එලඹෙන සමාජ පිපිරීමකට එරෙහිව, ධනේශ්වර පර්යාය රැකගැනීමට පොලිස්-මිලිටරි යාන්ත‍්‍රනයක් නිර්මානය කරන අතර තුර ආන්ඩු, ආතතීන් පිටතට හරවා යැවීමට උත්සාහ දරද්දී, යුද්ධය කරා තල්ලුව, දේශීයව නැගී එන පන්ති ගැටුම මගින් ද ගිනි ගන්වයි.

සියල්ලන්ටම යහපත් අනාගතයක් සැපයිය හැකි ආර්ථික ධන සම්පත්වල නිර්මාපකයින් වන ජාත්‍යන්තර කම්කරු පන්තිය සඳහා ඇති එකම මාවත, ජාත්‍යන්තර සමාජවාදී ක‍්‍රියාමාර්ගයක පදනම මත ජනතා යුද විරෝධී ව්‍යාපාරයක් ගොඩනැගීමයි. කම්කරු පන්තිය දේශපාලන බලයේ සුක්කානම සියතට ගත යුතු අතර එය, ලාභයේ අන පරිදි නොව, මානව අවශ්‍යතාවන්ගේ පදනම මත ලෝක ආර්ථිකය ප‍්‍රතිනිර්මානය කිරීම දෙසට හැරවිය යුතුය. ගෝලීය ධනවාදය මානව වර්ගයා විනාශයට ඇද දැමීම නතර කල හැකි අන් මගක් ඇත්තේ නැත.

එළඹෙන ජනාධිපතිවරණයට ඌව මැතිවරණයෙන් පාඩම්

Posted by Sri Lanka Guardian | | Posted in , , ,

| සුනන්ද දේශප්‍රිය

ආන්ඩු විරෝධී සියලු ජන්ද දායකයින් ජන්ද පොළට පැමිණය හොත් රාජපක්ෂ ආන්ඩුව පරාද කළ හැකි යැයි ජවිපෙ ප්‍රධාන ලේකම් ටිල්වින් සිල්වා මහතා කියා තිබුණි. සහතික ඇත්ත ය. වැදගත් වන්නේ එම ප්‍රකාශයේ පේළි අතරින් කියැවෙන දෙය යි. එනම්  රාජපක්ෂ ආන්ඩුව කෙරෙහි කළකිරී සිටින සියලු පුරවැසියන් ජන්ද පොළට ගන්වා ගැනීමේ අභියෝගය ජය ගැනීම  තවමත් සම්පූර්ණ වි නැති බවයි. පැහැදිලිවම ඌව මැතිවරණ සටනෙහි අවසන් ප්‍රතිපළයට බලපානු ඇති වැදගත්ම සාධකය වනු ඇත්තේ එය ම ය. 


එම අවස්ථාවේදී ම ටිල්වින් සිල්වා මහතා තවත් තීරනාත්මතක කරුණක් සඳහන් කොට තිබුණි. එනම් මෙම මැතිවරණය මැතකාලීන මැතිවරණයන් අතරින් ප්‍රචන්ඩතම මැතිවරණය වන බවයි. එක්සත් ජාතික පක්ෂයේ මහ ඇමැති තරඟකරුවන හරීන් ප්‍රනාන්දු ද එවැනිම ප්‍රතාශයක් කරමින් කියා තිබුණේ මෙම පළාත් සභා මැතිවරණයෙහි රාජ්‍ය සම්පත් අනිසි ලෙස ආන්ඩු පක්ෂය විසින් යොදා ගැනීම අතිශය ඉහළ මට්ටමක පවතින බවයි.

අප ඉහත කී මුල් ප්‍රකාශය, එනම් සියලු ආන්ඩු විරෝධී ජන්ද දායකයින් ජන්ද පොළට ගෙන්වා ගැනිමේ ප්‍රශ්ණය කියවිය යුත්තේ දෙවැනි ප්‍රකාශයන් ද සමඟ ය. එනම් අතිශය ප්‍රචන්ඩකාරී සහ දූෂිත මෙන්ම අනේක අලලස් මගින් ජන්ද දායකයා බියට සහ මෝහනයට පත් කරන මැතිවරණයක දී ආන්ඩු විරෝධී ජන්ද දායකයා ජන්ද පොළට ගෙන්වා ගන්නේ කෙසේද යන ප්‍රශ්ණය යි.

ඇත්ත වශයෙන්ම නම් මෙම සමීකරණයට එක් කල යුතු තවත් එක් තිරණාත්මක සාධකයක් තිබේ. එනම් බෙදී ගිය සහ පැහැදිළි විකල්පයක් බව තවමත් නොපෙන්වන විපක්ෂයක් උදෙසා ආන්ඩුව කෙරෙහි කළකිරී සිටින ජන්දදායකයා ජන්ද පොළට පැමිණිය යුත්තේ ඇයි ද යන කාරණය යි.

එනයින් ශ්‍රී ලංකාවේ අද පවත්නා මානව සහ ප්‍රජාතන්ත්‍ර විරෝධී අති දූෂිත අර්ධ ඒකාධිපති රාජපක්ෂ පාලනය පරාජය කිරීම අපේක්ෂා කරන අප හමුවේ ඌව මැතිවරණය ඇසුරෙන් තීරණාත්මක ප්‍රශ්ණ තුනක් පැන නගී.
1.    රාජපක්ෂ පාලනය කෙරෙහි කළ කිරී සිටින මහා ජනයා මැතිවරණයක සක්‍රීය සහභාගිත්වයකට ගෙන ඒම
2.    ප්‍රචන්ඩ සහ දූෂිත එමෙන්ම පෙර කිසිදා නොවූවිරූ අන්දමින් ජන්දදායකයා බියගන්වන සහඅල්ලසට නමා ගන්නා රාජපක්ෂ තන්ත්‍රයට සහ ජන්ද මැෂිමට මුහුණ දීම
3.    රාජපක්ෂ පාලනයට වඩා යහපත් සහ විශ්වසනීය විකල්ප ආන්ඩුවක හැඩ රැව පෙන්නුම් වැඩ සටහනක් මත පදනම් වූ  ප්‍රබල විපක්ෂයක් ගොඩ නැගීම
 
පෙනෙන අන්දමට ජනතා විමුක්ති පෙරමුණ අමතක කරන කාරණය වන්නේ ප්‍රථම ප්‍රශ්ණය ආමන්ත්‍රණය කිරීම පිණිස දෙවැනි සහ තුන්වැනි ප්‍රශ්ණයන්ට පිළිතුරු සෙවිය යුතු බව ය.  එමෙන්ම දෙවැනි ප්‍රශ්ණයට එනම් සමහර විට ඉතිහාසයේ පෙර නොවූ විරූ මට්ටමේ දූෂිත සහ ප්‍රචන්ඩ මැතිවරණය විය හැකි එලඹෙන කවර හෝ ජාතික මට්ටමේ මැතිවරණයකට මුහුණ දීම පිණිස තෙවැනි ප්‍රශ්ණය ආමන්ත්‍රණය කළ යුතු බවයි. මේ වනාහී හුදෙක් ජවිපෙ විසින් පමණක් අමතක කරන කාරණයක් නොවේ. ප්‍රධාන විපක්ෂය වන එක්සත් ජාතික පක්ෂ ද මේ තාක් මේ අරභයා ඉදිරිගාමී දැක්මක් පෙන්වා නැත.

දෙවැනි කාරණය විස්තරාත්මකව විමසා බැලීම තෙවැනි කාරණය කරා ගමන් කිරීමට අවකාශය විවාත කරයි.
රාජපක්ෂ ජන්ද මැෂිම එසේ මෙසේ එකක් නොවේ. එය රදා පවතින්නේ 18වන සංසෝධනය විසින් ඇති කරන ලද විධායක ජනාධිපති (රාජපක්ෂ) ඒකාධිපතිත්වය මතය. එමෙන්ම බියගැන්වීම සහ යටතට ගැනීම මගින් පාලනය කරනු ලබන ජනමාධ්‍ය විසින් නිරිමාණය කරනු ලබන මිත්‍යවන් මත ය.

ඌව මැතිවරණය විසින් පිහිටුවන ලද භයානකම පුර්වා දර්ශය වන්නේ මැතිවරණ කොමසාරිස්වරයා අබිභවා ආන්ඩු පක්ෂයේ වාසිය දේශපාලනකරණය කර ඇති අධිකරණය පාවිච්චි කිරීමට ඇති හැකියාවයි.

මොනරාගල දිස්ත්‍රික්කය ඉලක්ක කර ගෙන බැසිල් රාජපක්ෂ අමාත්‍යවරයා යටතේ නියං සහනාධාර යැයි කියා රුපියල් 2,500 බැගින් බෙදාදීම මැතිවරණය අවසන් වනතුරු දෙසතියක් කල් දැමීමට මැතිවරණ කොමසාරිස්වරයා දුන් නියෝගය ශ්‍රේෂ්ඨාධිකරණය අහෝසි කලේ එම තීරණය ගැනීමට තුඩු දුන් හේතු සාධක හෝ විමසන්නේ නැතිව ය. පෙරදින පවරන ලද මුලික අයිතිවාසිකම් පෙත්සමක් වහාම අප්‍රසිද්ධියේ විභාගයට ගෙන එක් දිනකින් තීන්දුවක් දීම මෑත කාලීන අධිකරණ ඉතිහාසයේ වාර්තාවකි. ශ්‍රී ලංකාවේ නියඟයට හසුව සිටින අනෙක් දිසාවන්ට එවැනි සහනාධාරයක් නොදී මැතිවරණය පැවැත්වෙන මොනරාගලට පමනක් ගෙවන්නේ ඇයි ද යන්න අධිකරණය සැලකිල්ලට ගත් බවක්වත් නොපෙනේ. එමෙන්ම දෙසතියක් සහනාධාරය පමා කිරීමෙන් මොනරාගල ජනයා හදිසි විපතකට ලක්වනු ඇතැයි අධිකරණය තීරණය කළේ කුමන හේතු මත දැයි  කිසිවකු දන්නේ ද නැත. අධිකරණයේ මෙම තීන්දුව මගින් සිදු වූ අනෙක් විපාකය වූයේ මැතිවරණ කොමසාරිස්වරයාගේ බලාධිකාරය හැල්ලුවට ලක් කිරීමයි. ඇත්ත වශයෙන්ම නම් එය අනාගතය සදහා දෙන ලද සඥාවකි.

පොලීසිය අද රාජපක්ෂ ජන්ද මැෂිමේ ලොකු ම ලොකු දැතිරෝධයකි. එය ඌව මැතිවරණයේ දී ක්‍රියාවෙන් ම පෙන්වුයේ එය රාජපක්ෂවාදී උපාංගයක් බවයි. මැතිවරණ අතරතුර පොලිස් නිලධාරීන්ට ස්ථානමාරු ලබා දීම තහනම් වුව ද මොනරාගල පොලිස් ස්ථානාධිපතිවරයා මාරු කිරීමෙන් දෙන ලද සංඥාව වූයේ නීතිය ක්‍රියාත්මක කිරීම දඩුවම් ලැබීමට වරදක් වන බවයි.

විපාක්ෂික දේශපාලන පක්ෂ කාර්යාල පනහකට අධික ප්‍රමාණයකට ප්‍රහාරයන් එල්ල වුව ද පොලීසිය කළේ නිදි වැද සිටීම පමණ ය. නිසි අංක තහඩු නැති රාජපක්ෂවාදී ඩිපෙන්ඩර් රථ මැතිවරණ ව්‍යාපාරයේ යෙදෙනු ජයාරෑපමය සාක්ෂි මගින් තහවුරු කර තිබියදීත් බදුල්ල නියෝජ්‍ය පොලිස්පති කීවේ තමන්ට නම් එවැනි වාහන හමු වී නැති බවයි. මැර තන්ත්‍රය වැඩට බැස තිබූ අන්දම ද විපාක්ෂික දේශපාලන පක්ෂ මත එල්ල වූ භීෂණයෙන් දැක්ක හැකි විය. එයට ආවරණය සැපයූයේ බොහෝතන්හි ම පොලීසිය යි.

ඌව මැතිවරණය යුද හමුදා පිරිස් ආන්ඩු පාක්ෂික දේශපාලන බලවේගයක් ලෙස යොදා ගැනීම ද තවත් වටයකින් ඉහළට ගෙන ආවේ ය. යුද හමුදා පිරිස් ජන්ද ව්‍යාපාරයේ යෙදෙන බවට මැතිවරණ නිරීක්ෂණ සංවිධාන ගණනාවක්ම  චෝදනා කළහ.

රාජපක්ෂ ජන්ද මැෂිම අල්ලස් දීම ඉහළට ම ගෙනැවිත් තිබේ.  ශ්‍රී ලංකාවේ මෑත කාලීන මැතිවරණ ඉතිහාසයෙහි බත් ගොට්ටා යන නම පටබැඳ තිබුණේ එක්සත් ජාතික පක්ෂය අනුගාමිකයින්ට ය.  ඒ යූඇන්පිය බෙදාදුන් බත් ගොටුවට ජන්දය දෙන්නේය යන අර්ථයෙනි. ජන්ද ලබා ගැනීම පිනිස මුදල් බෙදා දුන් අපේක්ෂකයින් සිටියේ ද දශක ගණනාවකට පෙර ය. නමුත් අද රාජපක්ෂවරුන් විසින් පිහිටුවා ඇත්තේ අත් ටැක්ටර්වල සිට සිල් රෙදි සහ වතුර බෝතල් දක්වා වූ කී නොකී විවිධාකාර අල්ලස් බෙදා දෙන මහා පරිමාණ දූෂිත ජන්ද මැෂිමකි. මේ සඳහා පාවිච්චි කැරෙන්නේ ද මහා ජනයාගේම සම්පත් වන රාජ්‍ය අරමුදල් ය.

රාජපක්ෂ ජන්ද මැෂිම සෑම අස්සක් මුල්ලක් ම සිය ග්‍රහණයට ගනිමින් සිටින බව පෙන්වන තවත් උදාහරණයක් වූයේ ජන්ද පත්‍රිකා මුද්‍රණය වැනි අතිශය ආරක්ෂාකාරී කාර්යන් කැරෙන රජයේ මුද්‍රණාලයේ අධිපති වශයෙන් රාජපක්ෂවාදී දේශපාලන ගැත්තකු පත් කර ගැනීමයි. 

හාත්පස මසා ගත් බූවල්ලකු වැනි මෙම ජන්ද මැෂිමට සහ මැර තන්ත්‍රයට මුහුණ දී මැතිවරණ ජයක් අත් කරගැනීම මහා පරිමාණ අභියෝගයක් බව ඌව මැතිවරණය යලිත් වරක් සනාථ කර තිබේ.

තනි තනිව තම තමන්ගේම වූ වැඩ සටහන් මත සටන් කරන විපක්ෂකට ශ්‍රී ලංකාවේ මේතාක් බිහිවූ  මෙම බියකරුම නපුරුතම ජන්ද මැෂිමට මුහුණ දිය හැකි ද ?
එවැනි තනි තනි මැතිවරණ වැඩ සටහන් මගින් ඒවා කොතරම් සිත් අඳගන්නා සුළු වුවත් ආන්ඩු විරෝධී සියලු ජන්ද දායකයා සක්‍රීය පුරවැසියකු බවට පත් කළ හැකි ද?
නැතහොත්  භීෂනයෙන් සහ දූෂණයෙන් පවත්වා ගැනෙන මෙම අර්ධ ඒකාධිපතිවයෙන් පීඩා විදින සියල්ලන්ටම එකඟවිය හැකි මහා පොදු සාධකය සොයා ගෙන ඒ වටා ගොනු කැරෙන මහා බලවේගයක් ඒ සඳහා අවශ්‍ය නොවන්නේ ද?

2014 සැප්තැම්බර් ඌව පළාත් සභා මැතිවරණය විසින් අප අභියසට ගෙනැවිත් ඇති අභියෝගය එය යි. සියල්ලටම ඇත්තේ තෙමසක් වැනි කාල පරිච්ජේදයක් විය හැකි ය. අප ඊට නිසි ආකාරයෙන් මුහුණ දෙන්නේ ද නැත් ද යන ප්‍රශ්ණය ශ්‍රී ලංකාවේ ප්‍රජාතන්ත්‍රවාදී බලවේග මුහුණ දෙන තීරණාත්මකම ප්‍රශ්ණ යි.

රජුන් තැනීමේ රාජකාරිය මාධ්‍ය මුදලාලිලා අතට ගැනීම

Posted by Sri Lanka Guardian | | Posted in , , ,

| ගාමිණී වියන්ගොඩ

 නොවැදගත් පුද්ගලයෙකු හෝ පුද්ගල කණ්ඩායමක් පමණට වැඩි ආකාරයකින් පත්තරවල හෝ විද්‍යුත් නාලිකාවල පෙනී සිටින්නේ නම්, ඒ පසුපස මාධ්‍ය මුදලාලිලාගේ හොර න්‍යාය පත්‍රයක් අනිවාර්යෙන් ඇති බව දැන් අපට නිසැකවම කිව හැක.

'සිරස' නාලිකාවේ දිනපතා ප්‍රවෘත්ති විකාශය තුළ මෛත්‍රී ගුණරත්න සහ බුද්ධික පතිරණ වැනි ප්‍රාදේශීය දේශපාලඥයන් දෙස තොරතෝංචියක් නැතිව උදේ හවා බලා සිටීමට කාලයක් අපට බල කෙරුණි.

මුලදී එක්සත් ජාතික පක්ෂයේ අභ්‍යන්තර ගැටුමක් වාර්තා කිරීමෙන් පටන්ගත් මේ ලූම්පන් මාධ්‍ය ව්‍යාපාරය අඛණ්ඩව දියත් වූ ආකාරයෙන් පැහැදිළිව පෙනී ගියේ, කෙලින්ම රාජ්‍ය නායකයන් තනන 'රාජකීය' වැඩපිලිවෙලකට මාධ්‍ය මුදලාලිලා අතගසා ඇති බවයි.

ඉහත කී ප්‍රාදේශීය දේශපාලඥයන් මේ අනුහසින් ඉතා කෙටි කාලයක් තුළ ජාතික තලයේ 'මුහුණු' බවට පත්වන අතර, ලේ උරුමය ප්‍රධාන දේශපාලනික සුදුසුකම වශයෙන් සළකන සජිත් ප්‍රේමදාස වැන්නන්, අනාගත රාජ්‍ය නායකත්වයට 'නිල'  සුදුසුකම් ලබති.  

රටේ දේශපාලනය තීන්දු කරන, පරදු දරන්නාගේ ප්‍රධාන භූමිකාව මාධ්‍ය අයිතිකරුවන්ගේ අයිතියට පත්ව දැන් කලක් ගතවෙයි. 60 දශකයේ දී මාධ්‍ය අනවශ්‍ය අන්දමින් රටේ දේශපාලනයට ඇඟිලි ගසති ය යන චෝදනාව යටතේ සිරිමාවෝ බණ්ඩාරනායක මැතිණිය රටේ ප්‍රධාන මාධ්‍ය ආයතනය රාජසන්තක කළාය. ඊළඟට 'දවස' පුවත්පත් ආයතනයටත් ඈ සීල් තිබ්බාය.

බණ්ඩාරනායක මැතිණිය එදා එසේ හැසිරුණ ද, අද තත්වය ගැන සළකන විට එදා මාධ්‍ය අපේ දේශපාලනයේ තැරැව්කාරකම් කළ ආකාරය, සාපේක්ෂ වශයෙන් ගත් විට, ඉතා මෘදු ය. එසේම, යම් තරමකට සංස්කෘතික ය. උදාහරණයක් විදිහට, ඒ ඒ ප්‍රවෘත්ති ආයතන පෙනී සිටියේ මොන පක්ෂයක් වෙනුවෙන් දැ යි එදා කිව හැකි විය. ඔවුන් කෙළේ තමන්ගේ වාර්තාකරණය හරහා ජනතා මතයක් ගොඩනැගීමෙන්, පවතින ආණ්ඩුවක් ආරක්ෂා කිරීමට හෝ ගෙදර යැවීමට කටයුතු කිරීමයි.

එය, ඕනෑම රටක මාධ්‍ය හරහා අඩු වැඩි වශයෙන් කෙරෙන්නකි. එහි හරි වැරැද්ද කෙසේ වෙතත්, ඒ ගැන බරපතල විවේචනයකට යාම තරමක් සංකීර්ණ කටයුත්තකි. මන්ද යත්, නූතන ලෝකයේ මාධ්‍ය තුළ, දේශපාලනය සහ ව්‍යාපාරික අවශ්‍යතා ගැට ගැසී ඇති පෙකෙණිවැල ඉස්සරට වඩා දැන් ශක්තිමත් වන බැවිනි.
 
අද අපට දකින්ට ලැඛෙන්නේ, විජේවර්ධනලාට වඩා සැඟවුණු න්‍යාය පත්‍රයක් යටතේ කටයුතු කරන තැරැව්කාර මාධ්‍යයකි. තමන් ප්‍රධාන වශයෙන් වගකීමට බැඳී සිටින්නේ, රටට සහ ජනතාවට යැයි විශ්වාස කරන මාධ්‍යයකට වඩා එය, තමන්ගේ ව්‍යාපාරික සහ දේශපාලනික අවශ්‍යතාවන්ට ප්‍රමුඛත්වය දිය යුතු යැයි අදහන, ඒ වෙනුවෙන් ඕනෑම මට්ටමකින් ජනතාව ඇන්දවීමට සහ පක්ෂ නායකයන්ව ප්‍රාණඇපකරුවන් වශයෙන් ගැනීමට අයිතියක් තමන්ට ඇතැ යි සිතත ගොඩපෙරකදෝරු මාධ්‍යයකි.

ආණ්ඩුව මෙන්ම විපක්ෂයත්, ජනතා අවශ්‍යතාවන් අනුව පෙළගස්වනවා සහ හැඩගස්වනවා වෙනුවට මේ මාධ්‍ය ආයතන කරන්නේ, තමන්ගේ පෞද්ගලික න්‍යාය පත්‍රවලට ගැලපෙන පරිදි එම පක්ෂ සහ ජනතාව ගැටගස්වා ගැනීමට බැලීමයි. මේ මජර මාධ්‍ය භාවිතය මොන තරම් දුරදිග ගොස් ඇත්ද යත්, තම පුවත්පත් සහ විද්‍යුත් මාධ්‍ය හරහා රනිල් වික්‍රමසිංහට පහර දීම නතර කිරීමට නම්, සජිත් ප්‍රේමදාසට එක්සත් ජාතික පක්ෂයේ නියෝජ්‍ය නායකත්වය දිය යුතු යැයි ඉල්ලීමට තරම් සාහසික වන සහ අසංස්කෘතික වන මාධ්‍ය මුදලාලිලා සිටින සමාජයක අද අපි ජීවත් වෙමු.

ජනතාව වෙනුවෙන් සිතා, රට ගැන සිතා රනිල් වික්‍රමසිංහ ගෙදර යා යුතු යැයි මෙතෙක් කල් කී එකී මාධ්‍ය මුදලාලිලා, සජිත් ප්‍රේමදාසට නියෝජ්‍ය නායකත්වය දෙන්නේ නම්, රනිල් වික්‍රමසිංහගේ තිඛෙතැ යි එතෙක් ඔවුන් කී අර සියළු වැරදි දැන් නිවැරදි විය හැක්කේ කෙසේදැ යි ජනතාවට පහදා දෙන්නේද? එසේම, කට්ටිවාදී සහ කල්ලිවාදී වෙතැ යි මෙතෙක් කල් සජිත් ප්‍රේමදාසට බැනපු එක්සත් ජාතික පාක්ෂිකයන්, එදා ඔහුව ඔසවා තබමින් තම නායකයාට බැනපු මාධ්‍ය දැන්වත් එයින් වැළකෙන්නේ නම්, සජිත් ප්‍රේමදාගේ නුගුණ කීමෙන් තමනුත් දැන් වැළකී සිටින්නේ කෙසේදැ යි ජනතාවට පහදා දෙන්නේද? කොටින්ම, එක්සත් ජාතික පක්ෂයේ නියෝජ්‍ය නායක තනතුර සජිත් ප්‍රේමදාසට පිරිනැමීමකින්, මේ දේශපාලන චරිත දෙකේම ඇතැ යි කී අප්‍රමාණ බාලගිරි දෝෂ සමනය වන්නේද? එවිට රනිල් වික්‍රමසිංහ 'සැබෑ' නායකයෙකු වී, සජිත් ප්‍රේමදාස එක්සත් ජාතික පක්ෂයට ආදරය කරන 'අනාගත නායකයා' බවට පත්වන්නේද?

මේ ක්‍රියාන්විතය පසුපස මාධ්‍ය මුදලාලිලා කිහිප දෙනෙකු සිටින බව දැන් මුළු රටම දනී. දේශපාලන තලයේ හඳහන් ලිවීම මාධ්‍ය මුදලාලිලා නැමැති ජ්‍යොතිෂඥයන් අතට මෙසේ ගනු ලැබීම, කොරේ පිටට මරේ වැනි අබග්ගයකට ජනතාව ඇද දැමීමකි. මෙතෙක් කල් ජනතාව බැටකෑවේ දේශපාලඥයන්ගේ අවස්ථාවාදී පටු අරමුණුවලිනි. දැන්, ඊට අමතරව, මාධ්‍ය මුදලාලිලාගේ පටු අරමුණු විසිනුත් ජනතාව මෙහෙවනු ලබන සහ ජනතාව අන්දවනු ලබන අවදියකට අපි පිවිසෙමින් සිටිමු.

විශේෂයෙන් 1994 සිට විපක්ෂයේ 'යාවජීව'  ආසනයට වැටුණු එක්සත් ජාතික පක්ෂය, ජනතාව සමග කළ යුතුව පැවති දේශපාලනය, මාධ්‍ය හරහා කිරීමට යොමු වීම මේ තත්වය ඇති කිරීමට එක හේතුවක් විය. පසුගිය කාලයේ රටේ ප්‍රධාන විපක්ෂය දේශපාලනය කෙළේ මාධ්‍ය සාකච්ඡා, පුවත්පත් සම්මුඛ සාකච්ඡා සහ ලිපි ලේඛන තුළිනි.

ආණ්ඩු පක්ෂය ඊට වෙනස් ආකාරයකින් දේශපාලනය කළ බවක් මෙයින් නොකියැවෙයි. එහෙත්, ඔවුන් ආණ්ඩු පක්ෂය වීම නිසාම, 'නීතියෙන්' සහ අවනීතියෙන් ඔවුන් සන්තකයේ පවතින සම්පත් ජාලයකත් අයිතිකරුවන් වීම නිසා, ඔවුන්ට ජනතාව වෙත 'භෞතික' ආකාරයකින් ආකර්ශනය වීමේ 'ස්වාභාවික' හැකියාවක් තිබේ.

එහෙත් එවැනි හයියක් විපක්ෂයකට ඇත්තේ නැත. විශේෂයෙන්, අනවශ්‍ය තරමේ දීර්ඝ කාලයකට විපක්ෂයේ අසුන් ගෙන සිටින විට, පුද්ගල මට්ටමෙන් එතෙක් ඔවුන්ව නඩත්තු කළ ව්‍යාපාරිකයන් පවා ටිකෙන් ටික හැලෙන්නේය. ඒ නිසා, ජනතාව සමග සෘජුව බද්ධ වීමේ සහ පොදු ජනතා ව්‍යාපාර තුළ ස්ථානගත වීමේ කොන්දේසිය, ආණ්ඩුවට වඩා විපක්ෂයකට වැදගත් වෙයි.

එක්සත් ජාතික පක්ෂය නොව, ඕනෑම විපක්ෂයක් එක දිගටම පරාජය වන්නේ, විශේෂ නායකයෙකුගේ අදක්ෂතාවකට වඩා, පවතින ක්‍රමයේ ස්වභාවය නිසා බව නැවත නැවතත් මේ කොලමේ විස්තරාත්මකව පෙන්වා දී තිබේ. එම තත්වය, අද එක්සත් ජාතික පක්ෂය සම්බන්ධයෙන් 1994 සිට බලපවත්වන ආකාරයටම, 1977-1994 දක්වා තිබූ ශ්‍රී ලංකා නිදහස් පක්ෂය ප්‍රමුඛ විපක්ෂයටත් එදා එක සේ බලපෑවේය. මේ නරක කලදසාව, විශෙෂ කරුණු යටතේ, අඩු වැඩි වීමට පිළිවන.

උදාහරණයක් වශයෙන්, ආර්. ප්‍රේමදාස ජනාධිපතිවරයා ඝාතනය වීම, චන්ද්‍රිකා කුමාරණතුංග මැතිණියට තීරණාත්මක වාසියක් ගෙන දුනි. අනිත් අතට, චන්ද්‍රිකා මැතිණිය වටා රොක් වූ බලවේග සහ සමස්ත සමාජ පෙළගැස්ම රනිල් වික්‍රමසිංහ වටා අද දකින්ට නැත්තේ, නායකයෙකු වශයෙන් ඔහුගේ කේඩෑරි දේශපාලනයට (උදාහරණ: අගවිනිසුරු දෝෂාභියෝගය ඉදිරියේ ඔහු ගත් ඔතෑනි ස්ථාවරය වැනි අවස්ථාවන්ට) අමතරව, රාජපක්ෂ රාජ්‍ය තන්ත්‍රයේ ආකර්ශණීය යුද ජයග්‍රහණය ඉදිරියේ සජිත් ප්‍රේමදාස වැන්නන් එක දිගටමත්, කරූ ජයසූරිය ඇතුළු තවත් පිරිස් විටින් විටත්, එක්සත් ජාතික පක්ෂයේ කකුල් දෙකෙන්ම ඇදීම නිසා ය. එහි දී, රනිල් වික්‍රමසිංහ සාතන් වී, සජිත් ප්‍රේමදාස මෝසස් වන්නේ නැත.

ඒ නිසා, අලියා ලකුණ යටතේ රනිල් වික්‍රමසිංහ විපක්ෂයේ ජනාධිපති අපේක්ෂකයා කරමින්, එක්සත් ජාතික පක්ෂයේ නියෝජ්‍ය නායකත්වය සජිත් ප්‍රේමදාසට පැවරීම පසුපස ඇති මාධ්‍ය මුදලාලිලාගේ සැලැස්ම, බොහෝ විට පහත සඳහන් දිශානතිය කෙරෙහි යොමු විය හැකි බවට සාධාරණ සැකයක් කෙනෙකු තුළ ඇති වුණොත් එය පුදුමයක් නොවේ.

ජනතා විමුක්ති පෙරමුණ, දෙමළ ජාතික සන්ධානය සහ මුස්ලිම් ප්‍රජාව ප්‍රමුඛ විපක්ෂයේ සියලූ බලවේගවල පොදු නියෝජනයකින් තොරව මහින්ද රාජපක්ෂව මේ මොහොතේ පැරදවිය නොහැකි බව අමුතුවෙන් කිව යුතු නැත. පොදු අපේක්ෂකයෙකු නොවී, හුදෙක් එක්සත් ජාතික පක්ෂ ජනාධිපති අපේක්ෂකයා වශයෙන් රනිල් වික්‍රමසිංහව ඉදිරිපත් කොට ඉදිරි ජනාධිපතිවරණයෙන් ඔහුව පරාජය 'කැරැවීම',  සජිත් ප්‍රේමදාසගේ අනාගත ජනාධිපති අපේක්ෂාවට තීරණාත්මක තල්ලූවකැ යි මාධ්‍ය මුදලාලිලා ගණන් හදනවා විය හැකිය. තව අවුරුදු හයකට මහින්ද රාජපක්ෂ මේ රටේ ජනාධිපතිවරයා වීමෙන් ඇති විය හැකි ප්‍රතිවිපාක වැල, සරළ සමීකරණයක් වශයෙන් ගත් විට, එවැනි අඳබාල හඳහන් ටක්කෙටම හරි යනු ඇතැ යි එවැන්නෝ සිතති.

VIDEO

OUR POPULAR STORIES

Archive

Powered by Blogger.